Градоначалникот на општина Гевгелија Иван Франгов вчера во Министерството за регионален развој на Бугарија, во Софија, го потпиша договорот за реализација на проектот „Афирмација на природните и културните вредности во пограничниот регион за подобра видливост и пристап”, одобрен од ИПА-Програмата за прекугранична соработка меѓу Македонија и Бугарија.
За реализација на овој проект се доделени вкупно 215.312 евра, од кои 169.692 евра за општина Гевгелија како лидер партнер, а преостанатите средства се наменети за партнерот Агенцијата за економски развој од Банско, Бугарија.
Во рамките на одобрениот проект предвидени се повеќе зафати и содржини за уредување на излетиштето Динќут во простор за забава, спорт и рекреација. Со проектот е предвидена изградба и уредување на Летно кино, односно изградба на амфитеатар со подвижно пано за летни кино-проекции. Исто така, предвиден е и простор за поставување на справи за фитнес и гимнастика, со што се овозможува практикување на вежби во природа. Потоа, уредување на детско игралиште со поставување на реквизити и опрема за забава на деца – трамбулина, тобоган и лулашки, вештачка карпа за искачување, како и игралиште за мал фудбал.
Покрај детското игралиште и игралиштето за мал фудбал, на Динќут ќе биде уредено уште едно детско игралиште со опрема од природни материјали – куќичка за деца, справа од јажиња, лулашки и слично. На Динќут, според проектот, е предвидена трим патека опремена со реквизити за трчање и вежбање наменети за возрасната група на посетители, изработени целосно од природни материјали. Се разбира, и урбана опрема, канделабри, клупи, корпи за отпадоци, информативни табли и чешми.
Предвидено е поставување на три летниковци со маси и клупи изработени од природни материјали, вклопени во конфигурацијата на теренот. Постојната техничка просторија, на влезот во локалитетот, ќе биде реконструирана и ќе служи за чување на опрема и контрола на локалитетот. Со целосната реконструкција и уредување Гевгелија на Динќут ќе добие ново и модерно катче за забава, спорт и рекреација. Со потпишувањето на договорот за реализација на проектот всушност почнуваат и активностите за негова имплементација.
Извор: Општина Гевгелија
