Во организација на Пионерски дом Гевгелија, Музеј на град Скопје и Фондација Аполонија, во Ликовниот салон на Фондацијата Аполонија, во четврток, 29-ти Септември 2016 година во 20.00 часот ќе се отвори изложба со наслов „Дивиот трендафил“ на авторката Виолета Силјан, по повод Јубилејот /1986-2016/ 35 години творештво.
Виолета Силјан е родена во 1956 година во Тетово. Училиште за применета уметност, на Одделот за сликарство, завршила во класата на проф. Родољуб Анастасов во 1976 година. Во 1986 година дипломирала на Факултетот за ликовни уметности, на Одделот за графика, во класата на професорите Драгутин Аврамовски-Гуте и Димитар Малиданов.
Од 1986 година е член на ДЛУМ.
Самостојни изложби
1985- Еффертикон, Швајцарија, изложба на слики во фоајето на Музичката школа на градот
1986- Цирих, Швајцарија, Изложба на слики во галерија „Idea“
1987- Цирих, Швајцарија, Изложба на слики во галерија „Am Hinterbеrg“
1991- Цирих, Швајцарија, Изложба на слики во галерија „Am Hinterbеrg“
1993- Париз, Франција, Изложба на слики во галерија „ Vardar“
1994- Цирих, Швајцарија, Изложба на слики во галерија „ Keller“
1995- Крива Паланка, Изложба на слики во Домот на културата
1995- Цирих, Швајцарија, Изложба на слики во галерија „ Kranich“
1997- Скопје, Камерна изложба на слики во Салон 1 во КИЦ
1997- Тетово, Изложба на слики во Домот на културатата
2016 – Музеј на град Скопје
2016 – Музеј на град Велес, Ликовен салон Велес
2016 – Музеј на град Неготино
2016 – Ликовен салон – Фондација Аполонија, Гевгелија
Групни изложби
Од 1985 do 2014 година учествувала на бројни групни изложби во: БИХ, Србија, Швајцарија, Франција, Руска Федерација и Бугарија.
Награди
1985- Награда на ФЛУ за најдобар студент на графичкиот оддел
1996- Награда за графика „Св. Климент Охридски“.
Колекции
Нејзините дела се застапени во приватни колекции во земјата и странство
За творештвото на Силјан во каталогот, меѓу другото Конча Пирковска пишува:
Современите толкувања на сите видови уметности ни укажуваат на непобитниот факт дека во светот на човечките вредности, сè се манифестира низ знаци; односно и самиот човек е знак, како и неговиот живот кој се одвива низ транспарентни значења кои претставуваат резултат на некои реални, имагинарни или несвесно потиснати желби.
Оттука и изложбата на авторката Виолета Силјан, чијшто генерален наслов е „Дивиот трендафил“, низ семиолошкитe принципи го презентира нејзиниот триесетгодишен творечки јубилеј. Страста за постојана автокреативност, желбата за изложување не само пред туѓата публика, туку и пред својата, без бегање од, и повлекување во себеси, Силјан годинава се охрабри, по долга апстиненција, повторно да се презентира пред македонската јавност.
На нејзината јубилејна изложба, низ строго селективен пристап, застапени се дела од различни ликовни медиуми (графики, слики и цртежи), кои се работени во периодот од 1985/6 година па сè до денес.
Но, со генералниот наслов кој е преземен од последниот циклус „Дивиот трендафил“, на извесен начин, според својот есенцијален концепт чија содржина е темелена на идентитетот на жената, т.е. на метафората на женскотo писмо, целата изложба, низ своевидната хомогенизација, ја манифестира сублимацијата како на циклусите, така и на другите дела.
Тргнувајќи од суптилно третираните графички листови застапени во извонредниот циклус „Commedia dell’аrte“ (во македонската уметност воопшто не е третиран ваквиот театрален oблик на ренесансната народна култура на Италија), па преку петте преостанати сликарски циклуси, и еден циклус на цртежи (во кој е застапен машкиот субјект), доминантен мотив е жената.
Генерално, стилскиот сликарски опус на Силјан е во духот на поетскиот, и ако може да се рече, на романтичарскиот експресионизам. Како што веќе потенциравме, нејзиниот централен мотив е женскиот субјект. Тој е поединечно или групно третиран од различни просторни ракурси, проследени со атрибутите кои и се иманентни на нејзиното битие.
Најголемиот број слики на Силјан во извесна смисла се автореферентни, така што со низата интимни приказни таа успеа да ја исткае мрежата од лично доживеаните „настани“ низ различните временски периоди. Со раскошниот комплементарен изблик, во кој се чувствува енергијата на гласот и мирисот на боите, низ колористичка експресија и експанзија, експлицитно, но селективно, авторката ни ја манифестира убавината на радоста, но и на страста од творечкото живеење.
Творештвото на Виолета Силјан претставува потрага и потврда на нејзиниот автентичен уметнички идентитет. Со посредство на материјата, т.е. со топлата музикално развиена колоратура, без цизелирање на детаљите на мотивите, таа се обидува да ја воспостави релацијата со скриената суштина на битието и да го еманира поинаквиот вид отвореност и радост кон животот.
